Вялікія савукі: Моладзь можа абараніць сябе

Нёман і яго прытокі - адна з нямногіх вялікіх рэк, дзе не толькі ў вялікай колькасці зімуюць, але і ў невялікай колькасці гняздуюць вялікія савукі (Mergus merganser).

У апошнія гады нават у межах гораду, а часамі непасрэдна ў ім. Таму летам сустрэць тут самку з вывадкам ці ўжо падрослых птушанят без суправаджэння самкі параўнальна нецяжка.

Прыкладна ў сярэдзіне лета маю ўвагу прыцягнулі два маладых савука ў цэнтры гораду на Нёмане. Можа яны адбіліся ад большай групы сіблінгаў або гэта былі рэшткі большага памерамі вывадка, якія толькі і засталіся ў жывых? Бо звычайна вывадкі ў савукоў значна большыя, з некалькіх птушанят.

Потым я пра гэтую сустрэчу забыў да часу, пакуль не ўбачыў тую ж (?) двойку на астраўках па сярэдзіне ракі, дзе яна адпачывала і чысцілася.

Аказалася, што не толькі я зацікавіўся гэтымі рыбаяднымі качкамі - час ад часу маладыя чайкі (клыгуны / рагатухі) выпрабоўвалі іх рашэнне чысціцца менавіта на гэтым астраўку, ці то спрабуючы дацягнуцца да іх дзюбай, ці інакш праяўляючы сваю цікаўнасць:

Аднак раз за разам моладзь савукоў давала адпор, выцягваючы доўгую шыю і паказваючы доўгую дзюбу з кручком на канцы і рагавымі зубчыкамі ў сярэдзіне. На нейкі час гэтага хапала, каб супакоіць чаек і качкі працягвалі адпачываць і даглядаць сваё пер'е.

28-08-2020, Нёман у Гродна

Аўтар - Дзьмітры Вінчэўскі