Больш чым за 4 мільёны эўра для крычак у Варшаве збудуюць “астравы”

Сталічны дадатак найвялікшай польскай „Gazety Wyborczej” праінфармаваў пра праект стварэння штучных астравоў для гняздуючых у Варшаве крычак. Акрамя гэтага, прадугледжваецца размясціць на такіх “астравах” пластыкавых птушак і параскідваць імітацыі птушыных экскрэментаў. Праект будзе рэалізаваны ў тым ліку і на грошы Еўракамісіі праз праграму LIFE+. 
Цяпер самыя шматлікія гнездавыя калоніі рачных крычак і белашчокіх рыбачак знаходзяцца на р.Вісла ў паўднёвай частцы Варшавы ў рэзерваце „Wyspy Zawadowskie”. Праблема гняздуючых тут на астравах птушак у тым, што часам сезонныя гвалтоўныя пад’ёмы вады ў Вісле знішчаюць і кладкі, і птушанят. Каб дапамагчы крычкам, Сталічнае таварыства аховы птушак (Stołeczne Towarzystwo Ochrony Ptaków) і д-р Анджэй Крушэвіч (dr Andrzej Kruszewicz), дырэктар Варшаўскага заапарку, падрыхтавалі заяўку на дафінансаванне ў рамках праекту LIFE+. Праект прадугледжвае не толькі стварэнне на аснове баржаў плывучых астравоў вагай да 120 тон, але таксама падгляданне за жыццём крычак з дапамогай інтэрнет-камер, падрыхтоўку назіральных вежаў ля Віслы і сцежак для аматараў прыроды ўздоўж берагоў. Прадстаўнік прэзідэнта Варшавы да спраў загаспадаравання ўзбярэжжаў Віслы Марэк Піваварскі (Marek Piwowarski) асабліва падтрымаў ідэю пабудовы вежаў для турыстаў і бёдуотчараў, а таксама невялікіх паркінгаў каля іх.
Каштарыс усяго праекту – больш за 4 мільёны эўра, прычым толькі менш за палову грошай прадугледжваецца прасіць у Еўракамісіі.
 

Здымак з калоніі рачных крычак на штучным востраве з www.birdwatching.pl
Паводле www.birdwatching.pl падрыхтаваў Дзьмітры Вінчэўскі для www.birdwatch.by

Comments

Справа ў тым, што там акрамя пліткі ды іншага закапваньня грамадзкіх грошай ужо пераходзяць да выкарыстаньня іх у карысных справах - аказваецца, таксама можна неблягія грошы засвоіць, ды яшчэ Эўропа дапаможа... А ў нас толькі Нёман загубіць ГРЭС, Аўгустоўскі канал перабудаваць ці цэнтр Горадні загадзіць пліткай - на большае мазгоў не хапае...