Гілі, снегапад і ...бэз

Дакументацыйныя здымкі і відэа

Хаця гілі (Pyrrhula pyrrhula) могуць - і ядуць - вельмі рознае насенне: і рабіны, і каліны, і ажыны, і крылаткі клёнаў-ясеняў ды і вельмі рознага пустазелля, але гэтай зімой я толькі другі раз бачыў, каб яны елі насенне бэзу. (Як ядуць бэзавыя пупышкі, бачыў не раз) 

Быў марозны дзень і валіў густы снег. Калі я праходзіў па амаль вясковай (але насамрэч гарадзкой) вуліцы, то не мог не заўважыць, як дзве самкі гіля выбіраюць насенне з былых суквеццяў куста бэзу адразу за агароджай на вучастку з драўлянай хатай. Мне пашанцавала, што гэта было вельмі блізка ад мяне і мне нават прыйшлося трошкі адыйсці назад каб не палохаць птушак:

Птушкі, у адрозненне ад многіх іншых выпадкаў харчавання гілёў, даволі часта, хаця і неадлёка пераляталі з галінкі на галінку. А праз хвілін 10 і зусім адляцелі.

Вельмі магчыма, што гілі былі вымушаны выбраць не вельмі смачнае (?) для іх насенне бэзу, каб тэрмінова падсілкавацца, бо паблізу ў кепскае надвор'е проста не знайшлі нічога лепшага, а мароз нагадваў пра неабходнасць аднаўлення энергіі.

Гродна, 20-01-2024

Аўтар - Дзьмітры Вінчэўскі