Смелыя круцігалоўкі. Частка V: Сваё і чужое жытло

Працяг. Пачатак – фота-гісторыі І, ІІ, III і IV.

Калі ў мяне атрымлівалася, я вяртаўся паназіраць і паздымаць смелых круцігаловак (Jynx torquilla), якія загнездавалі ў шпакоўні на падворку ў пойме Гараднічанкі. Яны гэтак жа рэгулярна прыносілі 'кукалак' мурашоў птушанятам і час ад часу прыбіралі за імі памёт, набіраючы яго ў дзюбу і выкідваючы яго недзе далей ад гнязда.  Так у дуплянцы-шпакоўні падтрымлівалася гігіена і заадно захоўвалася канспірацыя месца гнездавання, хаця яго і было бачна здалёк.

І вось неяк я заўважыў, што круцігалоўкі з памётам птушанят у дзюбе сталі прысажвацца на іншую шпакоўню, якая ўзвышалася над садам і знаходзілася метрах у 15-20 ад іх жытла. Нікога побач з ёй бачна не было - хутчэй за ўсё маладыя шпакі ўжо выляцелі з яе. І таму тое, што круцігалоўкі нечаму пачалі выкідаць памёт сваіх птушанят пад чужым, хаця і ўжо незанятым жытлом, выглядала дзіўна. У мяне нават з'явілася думка, што круцігалоўкі такім чынам адцягваюць увагу патэнцыйных драпежнікаў ад свайго гнязда і прыцягваюць да гэтага чужога. 

Але так гэта ці не даведаццца не атрымалася, хаця  праз 5 дзён пасля майго першага назірання круцігаловак з памётам на чужой шпакоўні з яе быў вывернуты вонкі гнездавы матэрыял і гэта яўна нехта зрабіў каб праверыць змесціва дуплянкі.

І ў той жа дзень там пачала прыпыняцца круцігалоўка з ежай у дзюбе, чаго раней я не бачыў. І я нават падумаў, што магчыма круцігалоўкі загнездавалі ў гэтай другой шпакоўні і самка там сядзіць на яйках у той час, як самец дакармлівае птушанят у першым гняздзе. Але, канешне, гэта было толькі прадпалажэнне, якое не пацвердзілася далейшымі назіраннямі.

Гродна, 15-21.06.2023

Аўтар - Дзьмітры Вінчэўскі

Працяг будзе