Кожны здымак у галерэі нашага сайту з'яўляецца ўласнасцю аўтара, які яго размясціў (калі не ўказана іншае). Для камерцыйнага выкарыстання любога здымка або яго часткі неабходны пісьмовы дазвол аўтара.
Пры некамерцыйным выкарыстанні спасылка на аўтара і сайт абавязковыя. Звяртайцеся да рэдактара:harrier@tut.by па ўсіх пытаннях
Пры выкарыстанні здымкаў у сацсетках, забаронена размяшчаць больш аднаго здымка з фотасерыі на пост, таксама абавязковы надпіс "больш здымкаў тут:" і далей канкрэтны адрас на знаходжанне фота-серыі на сайце.

All these pictures are copyrighted by the authors. Please respect the time and effort spent in shooting them.
If you have any questions or comments, please let us know: harrier@tut.by

Шэрыя вароны і чорная бузіна: Як яе есці правільна і ...незвычайна

шэрая варона

Калі проста параўнаць памеры шэрай вароны (Corvus cornix) і ягады чорнай бузіны (Sambucus nigra), стане зразумела, што гэтыя ягады не могуць быць звычайнай ежай для варон. Але часам яны ўсё ж ядуць гэтыя невялікія чорныя ягады - хутчэй як дэсерт, чым 'асноўную страву'.

І калі ў звычайных спажывальнікаў ягад бузіны: рудахвостак-чарнушак, шэрых лесак, лесак-завірушак і лесак-чарнагаловак часам праблемы ўзнікаюць з тым, як адарваць ягаду, праблема ў варон іншая і звязана як раз з іх памерамі, а калі дакладней - з вагой птуша. Бо галінкі бузіны каля гронак тонкія і зусім не разлічаны на тое, што на іх будзе сядзець птушка з вагой і памерам вароны, тым больш, што яна будзе абапірацца на іх і адрываць ягады:

Але тым дарослым варонам, якія выбралі гнездавы ўчастак з кустамі - і ягадамі - бузіны, усё ж варта паказаць сваім патомкам, што ягады бузіны можна есці (=яны не атрутныя) і як правільна сядзець і адрываць ягады, каб не зваліцца з куста:

Звычайна да сярэдзіны кастрычніка птушкі з'ядаюць усе, ці амаль усе ягады бузіны. Але на супрацьлеглым ад нас беразе чамусьці 3 ці 4 кусты у пойме ручаіны засталіся амаль некранутымі нават да канца кастрычніка. І вось адным вечарам я ўбачыў там маладую варону, якая з нечым у лапах прысела на гарызантальную галіну вольхі. Якім жа вялікім было маё здзіўленне, калі птушка пачала адрываць ад таго, што прынесла, невялічкія чорныя ягады (гл. верхні і другі здымак) - гэта была гронка чорнай бузіны! Як аказалася трошкі пазней, варона спецыяльна іх адрывала і перамяшчалася або побач на больш устойлівыя галінкі самой бузіны, або адлятала і сядала побач на вольхі, дзе і з'ядала без апасення зваліцца:

Бузіну на адным з кустоў елі тры вароны, але толькі адну з іх я заўважыў з інавацыяй. Але калі гэта сапраўды нашмат зручней для птушак, чым спрабаваць есці ягады непасрэдна 'з куста', думаю, што іншыя хутка навучацца адрываць гронкі і пераносіць іх.

Гродна, 22.09 і 31.10.2022

Аўтар - Дзьмітры Вінчэўскі

Каментары