Белая пліска і (сапраўдная) здабыча

На беразе Нёмана, ад вады, над ёй і далей, на набярэжнай, убачыць белых плісак (Motacilla alba) не праблема. Але так, каб паназіраць за іх паспяховым паляваннем, атрымліваецца нячаста. І вось сёння ўвечары мне пашанавала: самец пліскі с поўнай дзюбай нейкай здабычы прыляцеў ад вады на набярэжную, сеў на ходнік і стаў па ім адбягаць ад мяне.

Па дарозе нешта вывалілася ў яго і я падумаў, што гэта пэўна насякомыя, якіх птушка не змагла ўтрымаць у дзюбе. Але калі падыйшоў бліжэй, то аказалася, што гэта хутка і спраўна адарваная пара крылаў самкі страказы Calopteryx virgo. А калі я праз некалькі секунд нарэшце змог сфатаграфаваць і саму пліску, то ўбачыў, што і другой пары крылаў у страказы ў дзюбе ўжо няма і з яе звісае гатовая вячэра для птушанят, а можа і для гэтага самца, з якой ён і адляцеў уверх па плыні ракі.

Гродна, 22-05-2024

Аўтар - Дзьмітры Вінчэўскі