Першая падкаменка

Цёплы і сонечны ранак  спрыяў чаканню сустрэч з новымі для вясны відамі. І такія віды сапраўды сустрэліся на працягу дня. А першым з іх стаў самец палявой падкаменкі (Oenanthe oenanthe).

Сваю негучную і блытаную песенку ён спяваў, седзячы на даху прыбярэжнай карчмы. Месца было тым самым, дзе я штогод сустракаў у першай палове красавіка дарослых падкаменак, а потым, летам, і ўжо лётных птушанят. Так што, хутчэй за ўсё, вярнуўся адзін з пары 'старых гаспадароў', а не нехта з новых. Але можа быць і так, што месца гэтае настолькі пасуе для гнездавання падкаменак, што адразу і першым прыглянулася і новаму самцу. Ці гэта так, будзе бачна ў наступныя дні.

Спяваў ён хвілін 5-6, а потым вырашыў праверыць 'умовы харчавання' навокал карчмы. Для гэтага ён у два этапы  зляцеў спачатку на газон, а потым паскакаў на скошаны лужок у пошуках дробных безхрыбетных. Усё толькі пачынаецца.

08-04-2023, Гродна

Аўтар - Дзьмітры Вінчэўскі