Палявыя вераб'і: Першы выляцеў

Дакументацыйныя здымкі

Першага маладога палявога вераб'я (Passer montanus) я ўбачыў сёлета ў своеасаблівым месцы - пад высокім вязам на набярэжнай Нёману.  Як даволі хутка аказалася, ён ужо няблага лятаў, але самастойна шукаць (ці толькі знаходзіць?) ежу яшчэ не навучыўся. І адзін з бацькоў прыносіў яму раз за разам вылушчанае насенне вязу, якім навокал амаль усё было завалена. (Цікава, што майскі жук, якога бачна на некаторых здымках у бардзюра, не прыцягнуў увагу і маладой, ні дарослай птушкі)

Пасля 3 ці 4 порцый, пакладзеных дакладна і глыбока ў рот, верабейчык паскакаў на газон і нешта там спрабаваў самастойна схапіць з раслін, але нічога ў яго не атрымалася і ён адляцеў яшчэ далей ад ракі, дзе я яго і пакінуў у спакоі.

Гродна, 23-04-2025

Аўтар - Дзьмітры Вінчэўскі