Рачныя крычкі: Дачакалася

Амаль штодня праводжу ад паўгадзіны да гадзіны ў вусці Гараднічанкі. І часта назіраю там рачных крычак (Sterna hirundo), якія не толькі пралятаюць уніз і ўверх па плыні Нёмана ў пошуках рыбы, але і прызямляюцца на камяні, якія выступаюць з вады. Не вельмі зразумела, чаму некаторыя птушкі адпачываюць там па некалькі хвілін, чысцяць пер'е і нават купаюцца, а потым ляцяць далей, а іншыя сядзяць нашмат больш працяглы час, часам нават удвух і паводле іх выгляду, чакаюць.

Па паводзінах гэтыя другія хутчэй за ўсё самкі, якія крыкамі вітаюць партнёраў калі тыя пралятаюць побач і нават апускаюць уніз паўраскрытыя крылы і падымаюць дагары хвост.  І вось у адзін дзень з моцным ветрам адной з такіх самак прыйшлося чакаць больш гадзіны, пакуль самец здолеў злавіць і прынесці ёй рыбку. З-за таго, што яна была амаль адразу праглочана, а не аднесена некуды птушанятам, я думаю,  што самкі гэтыя прынамсі ў гэтым сезоне або не размнажаліся, або на нейкай стадыі страцілі яйкі або патомства, а самцы па нейкай прычыне - спадзяваюцца на паўторную спробу? - працягваюць іх карміць.

Нёман у Гродна, 30-06-2025

Аўтар - Дзьмітры Вінчэўскі