Ранкам пасля першых начных маразоў у пойме Нёмана ў т.зв. старога маста з'явіліся чорнагаловыя шчыгелы (Carduelis carduelis). Незадоўга перад гэтым яшчэ савецкі аўтобус высадзіў там дэсант мужыкоў з трымерамі і яны пакасілі ўсё, што з раслін вырасла з мінулага, яшчэ летняга пакосу, на схіле паміж набярэжнай і берагам ракі (апроч кустоў і дрэўцаў). Але дзе шырэйшая, дзе вузейшая засталася няскошанай палоска расліннасці ля самай вады - на ёй і прыпыніліся пад'есці трое шчыгелаў. Прычым найбольш іх цікавіла насенне аслінніку і цыкорыя, і яны вылушчвалі яго нікуды не спяшаючыся.
Калі адчувалі небяспеку, ненадоўга адляталі на бліжэйшыя кусты вярбы, але потым вярталіся да сваёй ежы, бо марозная ноч нагадвала, што лепш аднавіць энергетычныя запасы.
Гродна, 21-10-2025
Аўтар - Дзьмітры Вінчэўскі
- Увайдзіце ці зарэгіструйцеся каб пакідаць каментары.
КАМЕНТАРЫ