Увага – магчымая інвазія белакрылых крыжадзюбаў!

На прыканцы ліпеня ў Вялікабрытаніі была адзначана маладая самка белакрылага крыжадзюба (Loxia leucoptera), якая можа азначаць пацверджанне чарговай інвазіі віду ў розныя еўрапейскія краіны. Ў Швецыі цяпер на 77% больш назіранняў гэтых самых невялікіх еўрапейскіх крыжадзюбаў чым звычайна. Пры чым нярэдкія групкі ў 50, 60 і нават 130 птушак. Белакрылыя крыжадзюбы актыўна ляцяць праз паўднёвую Швецыю прыкладна ў паўднёва-заходнім напрамку.

Апошняя інвазія віду ў Еўропу адзначалася ў канцы ліпеня ў 2008 годзе. Тады ў Вялікабрытаніі было зроблена 28 рэгістрацый, у якіх адзначана агулам 65 птушак. Пад час інвазій гэты паўночны від птушак можа залятаць практычна ва ўсе краіны Еўропы, таму можна чакаць яго сёлета і ў нас. У Беларусі белакрылы крыжадзюб адзначаўся толькі два разы: ў ліпені 1930 і верасні 1990 году.
Цікава, што колькасць рэгістрацый сасновых крыжадзюбаў (Loxia pytyopsittacus), якія штогод гняздуюць у Швецыі, зменшылася на 58 %. Гэта можна азначаць, што як спецыяліст па насенню лістоўніцы, белакрылы крыжадзюб пачынае свае інвазійныя вандроўкі на поўдзень у гады з нізкай колькасцю насення лістоўніц, у той час як сасновы крыжадзюб у небагатыя на насенне сасны сезоны застаецца ў межах гнездавога арэалу або адкачоўвае на ўсход.

Яшчэ адзін від, які можна чакаць сёлета ў Беларусі – сава-бярозаўка (Surnia ulula). Колькасць рэгістрацый савы-бярозаўкі ў Швецыі цяпер павялічылася амаль у два разы, што паказвае выдатны гнездавы год для віду. Ў Беларусі гэты від апошні раз адзначаўся 9 лютага мінулага году.
 

Здымак з www3.hi.is

Паводле www.birdwatch.co.uk падрыхтаваў Дзьмітры Вінчэўскі для www.birdwatch.by

На гэтую тэму:
Шатландзкаму крыжадзюбу больш не пагражае знікненне

Вялікабрытанія можа страціць свой адзіны эндэмічны від птушак?
 

Сава-бярозаўка (Surnia ulula) ля літоўскай мяжы! Hawk owl at North of Belarus near Lithuanian border!