Новы для Беларусі від птушак, белаваллёвы дрозд, знойдзены мёртвым

Сумная падзея адбылася 21 кастрычніка 2025 году ў Віцебску, дзе Паліна Дубавая знайшла мёртвую птушку, якая яўна нядаўна разбілася аб шыбу мясцовага гандлёвага цэнтру. У прыродзе вертыкальныя празрыстыя паверхні, або тыя, што адлюстроўваюць наваколле, не сустракаюцца, і таму дзікія птушкі часта разбіваюцца спрабуючы праляцець праз іх, асабліва пад час міграцыі.

Птушка на здымку з Інстаграма вельмі падобная на самку белаваллёвага дразда (Turdus torquatus) падвіду alpestris - гэта птушкі, якія гняздуюць у гарах Цэнтральнай і Паўднёвай Еўропы. Найбліжэй да нас - у Карпатах, дзе сустракаюцца на вышынях ад 250 (больш звычайныя вышэй 700 м) да 1750 м в.у.м. і дзе від у некаторых частках гэтых гор даволі шматлікі. Увогуле ж гэта горная птушка, якая мае разарваны арэал і гняздуе выключна ў розных горных сістэмах ад Ірландыі і Брытанскіх астравоў на паўночным захадзе, праз Скандынавію і паўночны захад Расіі, у Заходняй, Цэнтральнай і Паўднёвай Еўропе ад Пірэнеяў, праз Альпы, Бескіды, Татры, Карпаты, Балканы, Грэцыю і Турцыю на ўсход да Туркменістана. Від зімуе ў краінах Міжземнамор’я, у Малай Азіі і Паўночнай Афрыцы. Паўднёвыя папуляцыі часткова аселыя.

Белаваллёвы дрозд з 1973 г. параўнальна рэгулярна адзначаецца ў Літве пад час вясновага і восеньскага пралёту, да 2017 г. там адбылося 39 рэгістрацый, аднак з іх толькі 4 не на марскім узбярэжжы ці паблізу яго.

Калі гэтую рэгістрацыю зацвердзіць Беларуская арніта-фауністычная камісія, якая разглядае ўсе назіранні новых і многіх рэдкіх для нашай краіны відаў птушак, белаваллёвы дрозд стане 344 відам ў спісе нашай арнітафауны.

Падрыхтаваў Дзьмітры Вінчэўскі

Выкарыстаны дадзеныя з кнігі Jusys V. et al. 2017 “NAUJI IR RETI PAUKŠČIAI LIETUVOJE”