Трэці сёлета новы для Беларусі від птушак, таўстадзюбая пячураўка, адлоўлены на поўначы краіны

Цудоўны дзень атрымаўся на станцыі кальцавання птушак “Сасновы бор”, што знаходзіцца ў аднайменнай вёсцы на самай поўначы Расонскага раёну і Беларусі. Сёння, 27 верасня, там адлавілі і закальцавалі новы для Беларусі від – таўстадзюбую пячураўку (Phylloscopus  szwarzi) і другую для нашай краіны сіняхвостку (Tarsiger cyanurus)!  

Падрабязнасці для нашага сайту расказвае Дзяніс Кіцель, арнітолаг, кіраўнік станцыі кальцавання птушак “Сасновы бор”:

 “Два дні таму ў адной з груп бёрдэраў на ФБ з’явілася паведамленне пра назіранне таўстадзюбай пячураўкі ў Маскве. І я падумаў, што від сібірскі і калі так далёка на захад заляцела адна птушка, магчыма што цяпер /у гэтым кірунку/ ляцяць і іншыя. На адной з двух нашых калонак я паставіў яе голас і вось пасля двух раніц і дзён прайгравання яна і злавілася!

Адбылося гэта паміж 1й і 2й гадзінамі дня. А на голас  сіняхвосткі з другой калонкі трапіла ў сетку другая /для нашай краіны/ сіняхвостка. Саша Собалеў дастаў яе з сеткі ў час першай праверкі, у 6.30. І з ранку ўвогуле было шмат птушак, каля 200 розных відаў. А пячураўка днём вісела ў сетцы разам з толькі 4 іншымі птушкамі” – сказаў Дзяніс.

птушка

Здымак Аляксандра Собалева

-Дзяніс, мала хто ведае, наколькі цяжкая і адказная праца – кальцаванне птушак на станцыі. Раскажы, калі ласка, пра ваш распарадак дня.

“Распарадак такі, што сеткі мы пастаянна правяраем з 6.30 раніцы ўвесь светлы час сутак і апошні раз ужо ў змроку. А сетак ставім агульнай даўжынёй 330 метраў. Пасля гэтага ставім яшчэ две савіных, у якія ловім соваў звычайна да 1й гадзіны ночы. Зараз дапамагаюць тры валанцёры і сёння прыехалі яшчэ трое. Але на новы від яны ўжо не паспелі” – сказаў Дзяніс.

-Калі помніш, у мінулы раз ты сказаў, што яшчэ не было на станцыі кальцавання году, каб вы злавілі два новыя віды птушак для краіны. І вось упершыню гэта атрымалася.  Цяпер варта ставіць новую мэту – тры новыя віды за год.

“Я быў задаволены і з адной сіняхвосткі, але вось і гэтая пячураўка злавілася)” – смяецца Дзяніс.

“30 верасня я планую заканчваць гэты сезон кальцавання. Магчыма, што калегі (Наталья Карліонава) яго яшчэ ненадоўга на станцыі працягнуць” – дадае ён. Таму застаецца невялікая імавернасць, што яны могуць злавіць і яшчэ нешта новае.

Усе з птушкай

І пра планы на больш-менш бліжэйшую будучыню:

“Гэта мой 8-ы новы від для  Беларусі. Наступныя два новыя для краіны віды, якія я хацеў бы адзначыць, гэта індыйская чаротаўка і заходні салавей. Але іх трэба хутчэй шукаць на поўдні, а не на поўначы”

Віншуем усіх кальцавальнікаў са станцыі кальцавання птушак “Сасновы бор” з цудоўным днём і жадаем чаканых і нечаканых знаходак.

птушка

Таўстадзюбая пячураўка гняздуе  ў лясах Паўднёвай Сібіры, Манчжурыі і ў паўночнай частцы  Карэйскага паўвострава, зімуюць жа птушкі ў Індакітае. Як і некаторыя іншыя вераб’іныя з Азіі, адзначаныя на восеньскім пралёце ў Еўропе, дзе яны не павінны быць паводле нашых уяўленняў і ведаў пра маршруты іх міграцыі і асноўныя месцы зімоўкі, такія птушкі лічацца або выпадкова залётнымі, або тымі, якія памылілі кірунак міграцыі на амаль супрацьлеглы, або тымі асобінамі, якія павінны зімаваць недзе ў Еўропе – што ўжо атрымалася даказаць для пячураўкі-зарнічкі.

У Польшчы з 1976 г., калі таўстадзюбая пячураўка была адзначаная ў першы раз, яе рэгістравалі ўсяго 8 разоў (дзве апошнія сустрэчы з відам адбыліся ў 2016 г.), прычым толькі 2 разы ў глыбіні краіны па-за узбярэжжам Балтыкі. Усе пячураўкі былі адзначаныя з канца верасня па канец кастрычніка.

У Літве вядомая толькі адзіная рэгістрацыя віда, якая адбылася на станцыі кальцавання “Вентас рагас” 01-06-1997 г.

Гэта ўжо трэці новы від птушак для Беларусі сёлета. Першым стаў арлан-даўгахвост, які быў адзначаны пад Мінскам на прыканцы лета; другім – сіняхвостка, адлоўленая і закальцаваная на той жа станцыі кальцавання “Сасновы бор” амаль два тыдні таму. Калі Беларуская арніта-фауністычная камісія (БАФК), без рашэння якой назіранні новых і многіх рэдкіх для краіны відаў не маюць навуковай сілы, зацвердзіць гэтую рэгістрацыю таўстадзюбай пячураўкі, від стане 340-м у Спісе птушак Беларусі. 

 

Падрыхтаваў Дзьмітры Вінчэўскі

Выкарыстаны дадзеныя з кніг:

Stawarczyk et al. (2017) "Rzadkie ptaki Polski"

Jusys et al. (2017) NAUJI IR RETI PAUKŠČIAI LIETUVOJE

Верхні і ніжні здымкі Максіма Косціна 

 

На гэтую тэму:

СІНЯХВОСТКА – ДОЎГАЧАКАНЫ НОВЫ ВІД ПТУШАК, АДЗНАЧАНЫ ДЛЯ БЕЛАРУСІ

НОВЫ ДЛЯ БЕЛАРУСІ ВІД ПТУШАК, АРЛАН-ДАЎГАХВОСТ, АДЗНАЧАНЫ ПАД МІНСКАМ!

В СПИСКЕ ПТИЦ БЕЛАРУСИ ТЕПЕРЬ 337 ВИДОВ: ПРОТОКОЛ ЗАСЕДАНИЯ БОФК ОТ 11.03.2021 И ОБНОВЛЕННЫЙ СПИСОК ПТИЦ БОФК

Новы для Беларусі від птушак – стрынатка-рэмез – адлоўлены на поўначы краіны!

Пячураўкі-зарнічкі пачалі зімаваць у Еўропе!