Як мы глядзелі другога для Польшчы жаўтаногага куліка

Увесь тыдзень на сажалках каля Коцка (Kock) пад Люблінам сядзеў жоўтаногі кулік (Tringa flavipes). Не абы які – бо толькі другі для Польшчы! (Першая рэгістрацыя гэтага амерыканскага віду адбылася на прыканцы верасня яшчэ ў 1990 годзе.)

Па прапанове сябра нарэшце і мы 19 лістапада вырушылі на назіранні. Пасля троху больш, чым двухгадзіннага падарожжа мэта - ставы – ў засягу бінокля!Але забалочаныя прасторы пустыя. Вандруем па дамбах, бачым чорнаваллёвага гагача, нырка-маранку (!) і шмат рознай птушынай драбніцы. Куліка аднак няма!

Зазіраю на Фэйсбук: можа аднак хто-небудзь яго сёння бачыў, але дзе? Нарэшце дапамога прыходзіць!

Знаходзім "tring’у" сярод кнігавак на вялікім, спушчаным ставе недалёка ад шашы. Адлегласць аднак вялікая, але ў змроку, які пачынае паволі апаноўваць наваколле, бачым – гэта мусіць быць ён. Па дамбе падкрадаемся бліжэй і толькі цяпер атрымліваецца разгледзець выразна жоўтыя “хадулачнікавыя” ногі, далікатную дзюбу і агульна шэрае пер’е.

жаўтаногі кулік

Яшчэ адзін хуткі пагляд – светлае надхвосце пры шэрых плячах - гэта "flavipes" нa 100%.

бёрдэры

Узрадаваныя, назіраем за птушкай з-за трыснягу і негледзячы на кепскія ўмовы асвятлення цяпер можам больш не спяшацца і спакойна нацешыцца нават яе голасам.

Робіцца ўсё цямней і жоўтаногі кулік разам з кнігаўкамі ўзлятае – да пабачэння!

жаўтаногі кулік