Новае даследаванне паказала, што трохпалыя чайкі (Rissa tridactyla) з большай імавернасцю будуць зімаваць у заходняй Атлантыцы калі іх гнездаванне скончылася няўдачай.
Самы марскі від чаек Вялікабрытаніі звычайна зімуе па абодва бакі Атлантычнага акіяну, але застацца ва ўсходняй частцы Атлантыкі або пераляцець ў заходнюю залежыць ад поспеху гнездавання.
Каманда даследчыкаў з Цэнтру экалогіі і гідралогіі пад кіраўніцтвам д-ра Марыі Багданавай размясціла адмысловыя маленькія прылады – геалакатары вагой 1,4 г – на 80 трохпалых чаек, якія гнездавалі на востраве May NNR. Геалакатары рэгіструюць дату і даўжыню светлай часткі сутак, па якой потым можна даведацца геаграфічныя каардынаты месца дзе былі птушкі. Дадзеныя з пераадлоўленых птушак паказалі, што як і ў многіх іншых відаў, чайкі, гнездаванне якіх у гэтым сезоне скончылася няўдачай, пакідаюць сваю калонію вельмі рана і вандруюць на адлегласць каля 3000 км у заходнюю Атлантыку. Птушкі, якія паспяхова адгнездавалі, застаюцца зімаваць на брытанскім узбярэжжы. Цікава, што птушкі з абодвух груп вяртаюцца ў гнездавую калонію у той самы час!
Можна паспрабаваць растлумачыць такія паводзіны птушак тым, што ўжо негняздуючыя асобіны такім чынам пазбягаюць канкурыраваць з гняздуючымі за ежу. Смяротнасць дарослых птушак найбольшая ўзімку, і многія такія выпадкі смерці раней карэлявалі з тымі коштамі, якія птушка панесла пад час мінулага гнездавога сезону. Канешне, непаспяховыя ў гнездаванні птушкі маюць больш часу для далёкай міграцыі, аднак па атрыманых дадзеных з геалакатараў, падарожжа на амерыканскае ўзбярэжжа Атлантыкі займае толькі каля 9 дзён, таму незразумела, чаму “паспяховыя” птушкі ўсё ж застаюцца на зімоўку недалёка “ад дома”.
Папярэднія дадзеныя, атрыманыя ад акальцаваных птушак паказвалі, што трохпалыя чайкі могуць даволі далёка адлятаць на зімоўку. Ніхто не мог і падумаць, што існуе такі выразны падзел у выбары месцаў зімоўкі.
У апошнія гады папуляцыя трохпалых чаек выразна змяншаецца. Ахова месцаў зімоўкі можа дапамагчы ў ахове віду. Ў той жа час павелічэнне колькасці птушак, якія зімуюць у Заходняй Атлантыцы будзе азначаць, што ўсё больш чаек не выводзяць патомства.
Поўная назва артыкула:
Bogdanova, M I, Daunt, F, Newell, M, Phillips, R A, Harris, M P and Wamless, S. 2011. Seasonal interactions in the black-legged kittiwake, Rissa tridactyla: links between breeding performance and winter distirbution. Proceedings of the Royal Society B: doi:10.1098/rspb.2010.2601.
Паводле www.birdwatch.co.uk (тэкст і здымак) падрыхтаваў Дзьмітры Вінчэўскі для www.birdwatch.by
здымак з www.photo.net
На гэтую тэму:
Поспех чаек - смецце
Другая рэгістрацыя шыфера-спінай чайкі ў Заходняй Палеарктыцы
- Увайдзіце ці зарэгіструйцеся каб пакідаць каментары.
КАМЕНТАРЫ