Сталі вядомыя філагенетычныя сувязі зніклага каралінскага папугая

Дзякуючы ДНК, атрыманаму з двух музейных экземпляраў вынішчанага каралінскага папугая Conuropsis carolinensis, навукоўцы выявілі яго сувязі з іншымі прадстаўнікамі атраду.

Некалі шырока распаўсюджаны ад Фларыды да ўзбярэжжаў Антарыё, адзіны эндэмічны папугай Паўночнай Амерыкі, знік у пачатку 1920-х гадоў у вынікі няшчадных адстрэлаў, бо фермеры лічылі гэтых птушак шкоднікамі. Яго месцапражыванні, біялогія і пералёты ніколі не даследаваліся навукова. А магчымае таксанамічнае становішча было вызначанае па біяметрычным дадзеным з пазасталых у музейных калекцыях скурках.

Гэтыя параўнанні паказалі блізкае радство каралінскага папугая з папугаем-манахам Myiopsitta monachus  з Паўднёвай Амерыкі, галоўным чынам таму, што абодва гэтыя віды мелі цалкам апераную васкавіцу –ўчастак скуры вакол дзюбы. Цікава, што менавіта гэты апошні від у якасці інтрадуцента займае экалагічную нішу вынішчанага каралінскага папугая ў некаторых частках ЗША. Каманда навукоўцаў з Нью Йорку і Нью Мексіка вылучыла і секвеніравала мітахандрыяльныя ДНК 43 відаў з 28 родаў неатрапічных папугаяў, уключна з каралінскім і папугаем-манахам каб атрымаць сапраўднае філагенетычнае дрэва папугаяў Новага свету.

Паводле атрыманых вынікаў, апераная васкавіца ўзнікла ў апошніх дзвюх відаў незалежна, таму што іх злучае паміж сабой толькі даволі аддаленае радство. Каралінскі папугай аказаўся найбольш блізкі да доўгахвостых папугаяў з радоў Aratinga і Nandayus. Усе амерыканскія папугаі паходзяць з Паўднёвай Амерыкі пасля таго, як яна аддзялілася ад суперкантыненту Гандвана каля 110 мільёнаў гадоў таму.

Дадатковыя вынікі кажуць пра тое, што род Aratinga ёсць поліфілетычным і ў выніку далейшых даследаванняў павінен быць падзелены.

Крыніца:

Kirchman, J J, Schirtzinger E E and Wright, T F. 2012. Phylogenetic relationships of the extinct Carolina Parakeet (Conuropsis carolinensis) inferred from DNA sequence data.　The Auk　129: 1-8.

Паводле www.birdwatch.co.uk падрыхтаваў Дзьмітры Вінчэўскі для www.birdwatch.by

Малюнак каралінскіх папугаяў John James Audubon з www.wildbirds.org 

На гэтую тэму:

Гавайскія квяткоўніцы паходзяць ад... чаромашнікаў

З дапамогай генетыкаў знайшлі крэўных вандроўнага голуба

Генетыкі адкрылі новы від папугая, які знаходзіцца на мяжы знікнення

 Блізкія па паходжанні птушкі часта маюць вельмі розны выгляд і песні

 Вынішчыць адных папугаяў каб захаваць іншых

Вымерлы дрозд насамрэч... авяльга

Параўнальная генетыка крумкачовых – новы этап