З'езд АПБ: асноўныя вынікі

У марозную суботу 28 студзеня адбыўся чарговы з'езд АПБ.

Цікавыя прэзентацыі на актуальныя тэмы аховы прыроды Беларусі, экаадукацыі і магчымых напрамкаў развіцця АПБ чаргаваліся з афіцыйнымі справаздачамі і ўзнагароджаннем прызёраў і пераможцаў розных конкурсаў нашай арганізацыі.

Аднак найбольш важнымі справамі сталі выбары дзьвух сябраў Цэнтральнага Савету і галасаванне за наданне статусу ганаровых сябраў АПБ ажно тром асобам.

У выніку сябрамі ЦС на наступныя тры гады абраныя Ірына Самусенка (лабараторыя арніталогіі НВЦ НАН Беларусі па біярэсурсах, Мінск) і Алег Кальчанка (захавальнік ТВП "Званец", Кобрынь):

Ірына Самусенка

Алег Кальчанка

І калі ў выпадку выбараў сябраў ЦС інтрыга захоўвалася да абвяшчэння вынікаў, то ў тым, што:

Фрэдэрык Гушча - ініцыятар выпуску серыі паштовых марак "Птушка года Беларусі" (з лагатыпамі АПБ і BirdLife International), іншых марак і канвертаў з выявамі птушак, а таксама актыўны і паспяховы філатэліст, пераможца шматлікіх міжнародных і беларускіх філатэлістычных выставаў, былы мэр г.Скідаля;

Мікалай Гулінскі - выдатны фотаанімаліст, пяціразовы пераможца Гродзенскага абласнога фотаконкурсу "Нашы птушкі", чые здымкі птушак (і не тольк)і шмат разоў друкаваліся ў розных беларускіх часопісах і кнігах, а цікавыя назіранні апублікаваныя ў навукова-папулярных і навуковых выданнях, палкоўнік КДБ у адстаўцы з Гродна;

Генадзь Міндлін - арнітолаг і натураліст, супрацоўнік Заалагічнага музею БДУ (Мінск), які ў 2011 годзе адзначыў 60-годдзе, але праводзіць не менш за 2 месяцы ў год у палявых намётах у вывучэнні птушак па ўсёй Беларусі, мае шматлікія навуковыя і папулярныя артыкулы, прысвечаныя нашым птушкам, а па колькасці правераных гнёздаў драпежных птушак і соваў не мае сабе роўных;

у тым, што яны стануць ганаровымі сябрамі АПБ, ні ў каго сумневаў не было. І сапраўды, адзінагалосна прысутныя на з'ездзе прагаласавалі "за" наданне ім гэтага агнаровага статусу.

На пачатак 2012 году ў АПБ 3372 сябры, 14 рэгіянальных аддзяленняў і 146 клубаў "Крылаты дазор". І хаця 81% сябраў працягнулі сваё сяброўства з 2010 году і разам з новымі сябрамі іх колькасць павялічылася на 18% у параўнанні з 2010 г., менавіта праца па развіццю арганізацыі і з людзьмі выглядала найменш паспяховай, бо агульнае дасягненне стратэгічных мэтаў у абодвух гэтых кірунках склала толькі каля 50%.

У першых шэрагах: к.б.н. Уладзімір Іваноўскі (сябра ЦС АПБ), Сяргей Дамашэўскі (арнітолаг з Украінскага цэнтру даследавання драпежных птушак, Кіеў), д.б.н. Васіль Грычык (сябра ЦС АПБ), Генадзь Міндлін (ганаровы сябра АПБ), Аляксандр Вінчэўскі (Старшыня АПБ).

Пад час з'езду некаторыя сытуацыі таксама нагадвалі пра не вельму ўдалае планаванне і працу з сябрамі АПБ. Бо, напрыклад, хаця пераможцы конкурсу на лепшае аддзяленне АПБ з Брэсцкага абласнога аддзялення змогуць сёлета рэалізаваць міні-праекты на 500 у.а. у якасці ўзнагароды, то прадстаўнікі Барысаўскага гарадзкога аддзяленне за другое месца ў тым жа конкурсе ў якасці ўзнагароды атрымалі ... ліхтарык.

Многія прызёры і пераможцы конкурсаў нават з Мінска чамусьці не змаглі атрымаць свае дыпломы і прызы на з'ездзе, бо былі або не запрошаныя асабіста, або па нейкіх прычынах не дачакаліся ці не змаглі выйсці на сцэну.

Пад час рэгістрацыі сябры АПБ атрымлівалі другі нумар часопіса "Птушкі і мы" за 2011 год, аднак ніякіх прабачэнняў за больш чым месячную затрымку з яго выпускам не прагучала.

Аднак прыемна, што арганізацыя развіваецца і спадзяемся, што недахопы і памылкі будуць выпраўляцца на карысць птушак і людзей.

Дзьмітры Вінчэўскі для www.birdwatch.by

здымкі аўтара

Увайдзіце ці зарэгіструйцеся каб пакідаць каментары.

Comments

biot - 29.01.2012 - 23:56

КАМЕНТАРЫ

CLUB200

АПОШНІЯ ФОТАЗДЫМКІ

З'езд АПБ: асноўныя вынікі

Comments