Кнігу пра драпежных птушак Віцебскага Паазер’я можна замовіць у аўтара

 Кнігі, прысвечаныя птушкам Беларусі, на жаль, выходзяць у нас не штогод. Тым больш цікавай будзе свежая манаграфія, якая прадстаўляе вынікі шматгадовых даследаванняў і аховы драпежных птушак вельмі своеасаблівага рэгіёну – Віцебскага Паазер’я. Аўтар кнігі – Ўладзімір Валенцінавіч Іваноўскі, ганаровы сябра АПБ.

Уладзімір Валенцінавіч нарадзіўся ў Дагестане (Расія) ў 1946 годзе, а з 1972 г. звязаў сваё жыццё з Віцебшчынай і яе птушкамі, сярод якіх найбольш увагі прысвяціў даследаванням Сокалападобных і птушкам верхавых балот. Ён – вядомы беларускі арнітолаг, аўтар больш 200 публікацый пра птушак нашай краіны, былы Старшыня АПБ і дзейны сябра Цэнтральнага Савету гэтай арганізацыі. У апошнія гады У.Іваноўскі працуе дацентам кафедры экалогіі і аховы прыроды Віцебскага дзяржаўнага ўніверсітэта імя П.М.Машэрава, ў выдавецтве якога і выйшла яго кніга:

Ивановский В.В. Хищные птицы Белорусского Поозерья: Монография.– Витебск: Изд-во УО «ВГУ им.П.М. Машерова”, 2012. – 209 с. [+ 16 c. цвет. илл.]. УДК 598.279 (476.5)

Манаграфія выйшла пад навуковай рэдакцыяй знакамітага даследчыка драпежных птушак д-ра біялагічных навук, прафесара Уладзіміра Міхайлавіча Галушына (Масква), у якасці рэцензентаў выступілі вядучыя спецыялісты па гэтай групе птушак з Расіі: д-р біял. навук, праф. В.П. Белік і д-р біял. навук, праф. А.І. Шэпель.

 У манаграфіі прадстаўлены вынікі даследаванняў з 1972 па 2011 гады 21 віду драпежных птушак, якія сустракаюцца ў Беларускім Паазер’і. Прааналізаваны біятапічнае размяшчэнне і колькасць, феналогія, размнажэнне, трафічныя сувязі. На аснове аналізу негатыўных фактараў, які абмяжоўваюць колькасць і пагаршаюць стан папуляцый Сокалападобных, а таксама на аснове шматгадовага практычнага досведу аўтара, ў кнізе прыведзены канкрэтныя метадычныя распрацоўкі па ахове гэтай групы птушак. Змест кнігі глядзі ніжэй.

Кніга без сумневаў будзе цікавай арнітолагам, заолагам, выкладчыкам адпаведнага профілю ВНУ і настаўнікам, аматарам птушак і спецыялістам адпаведных структур, звязаных з аховай і выкарыстаннем прыродных рэсурсаў.

Каб атрымаць кнігу накладзеным плацяжом (кошт кнігі 50000 бел. руб. + 6000 руб. перасылка ў межах Беларусі), трэба даслаць аўтару сваё імя, імя па-бацьку і прозьвішча, а таксама падрабязны паштовы адрас з індэксам на электронную пошту <ivanovski@tut.by>

 Для тых, хто жадае замовіць кнігу не з Беларусі, трэба асобна дамаўляцца пра гэта з аўтарам.

СОДЕРЖАНИЕ