Рудахвосткі-чарнушкі і бузіна: адкручваем ягады

Чарговы сезон я шмат часу назіраю за харчаваннем птушак на чорнай бузіне. І, здавалася б, усё ўжо бачыў і ведаю, але пастаянна адзначаеш нешта новае і ёсць магчымасць часам інакш інтэрпрэтаваць нейкія паводзіны.

Найбольш масавым пастаянным спажыўцом ягад бузіны у цэнтры Гродна, дзе я за імі назіраю, з'яўляюцца рудахвосткі-чарнушкі (Phoenicurus ochruros). Звычайна гэта самкі ці маладыя птушкі, якіх цяжка адрозніць, значна радзей- самец (ці самцы?)

Птушкі спачатку назіраюць за месцам будучага харчавання з невялікай адлегласці і выбіраюць яго або ацаніўшы ступень небяспекі - тады сядаюць на самыя верхнія гронкі, амаль прыкрытыя галінкамі і лістамі, або самыя смелыя - значна ніжэй. тут і ягад больш, але яны адкрытыя не толькі для рудахвостак.

І тут ёсць дзве асноўныя тактыкі: першая, пра якую тут гаворка - седзячы на гронцы, адкруціць ягаду, выварачваючы галаву - і ягаду - або пад сабой, або над сабой. 

Не заўсёды гэта атрымліваецца з першага разу, але калі ніхто і нічога не перашкаджае, ад 2 да 5 ягад птушка з'ядае. А потым або адлятае туды, адкуль прыляцела, на некалькі метраў убок, або злятае на ходнік і там 'закусвае' ягады невялікім насякомым)

22-08-2021, Гродна

Аўтар - Дзьмітры Вінчэўскі