Начных драпежнікаў стала больш (+ VIDEO)

    Дзякуючы уэб-камеры, ўсталяванай на касцёле, атрымалася даказаць, што вандроўныя сокалы могуць паляваць нават уначы. Начны прынос яшчэ жывога куліка-слонкі паказаў, што сокалы паспяхова выкарыстоўваюць начное святло гарадоў.

   Вандроўныя сокалы па праву лічацца аднымі з самых дасканалых паветраных драпежнікаў. Іх пікіраванні на здабычу ёсць самым хуткім палётам сярод дагэтуль адзначаных у жывёльным свеце і дасягаюць хуткасці каля 300 км на гадзіну.  Пасля ўзнаўлення амаль зніклай у Паўночным паўшар’і з-за выкарыстання чалавекам ДДТ папуляцыі гэтага віду, апошнія дзесяцігоддзі ўсё больш вандроўных сокалаў  гняздуюць у гарадах. Пад час даследаванняў такіх “гарадзкіх” птушак у навукоўцаў узніклі падазрэнні, што як мінімум некаторыя сокалы могуць паляваць нават уначы.  
Увосень і ўзімку часам атрымлівалася знаходзіць рэшткі здабычы, сярод якой былі слонкі, перапёлкі, пастушкі і нават малыя коўры. Ўсе пералічаныя віды мігрыруюць амаль выключна ў начны час. 
     Кафедральны касцёл у Дэрбі (Вялікабрытанія) мае адмыслова ўсталяваную уэб-камеру, накіраваную на самую любімую прысаду тамтэйшых вандроўных сокалаў на яго шпіле. 20 снежня 2009 году прыкладна ў 22:45 адзін з сокалаў вярнуўся з яшчэ жывым куліком у лапах, якога мусіў толькі што злапаць.  Пасля чаго камера паказала як сокал забіў слонку і пачаў есці.
    Нік Браўн (Nick Brown) з Derbyshire Wildlife Trust, сказаў: "Мы ўпэўнены, што он-лайн рэпартаж нашай камеры – першы доказ такога тыпу для вандроўных сокалаў. Гэта сапраўднае навуковае адкрыццё для біялогіі гэтага віду, які шырока гняздуе ў гарадах на чатырох кантынентах.”
Фільмік працягласцю 5 хв 40 сек можна паглядзець тут.
http://www.birdwatch.co.uk/website/content/view/3019/32/

Здымак вандроўнага сокала з www.hawkquest.com

Паводле www.birdwatch.co.uk падрыхтаваў Дзьмітры Вінчэўскі для www.birdwatch.by
 

На гэтую ж тэму:
Падглядзець за жыццём вандроўнага сокала? – лёгка!

За жыццём вандроўных сокалаў можна глядзець он-лайн таксама з Барселоны