Вялікі голуб і жалуды 'у дарогу'. Частка І

У мінулым годзе не без здзіўлення я адкрыў для сябе як вялікія галубы (Columba palumbus) вельмі актыўна ядуць жалуды. Аднак той восенню пад тымі ж самымі дубамі гэтым жа займаліся і сойкі, і гракі, і шэрыя вароны і нават каўкі. І я думаў, што той год быў багаты на жалуды, а гэты, згодна з ‘тэорыяй пра ўраджайныя і неўраджайныя гады’ для дубоў, такім быць не можа. Да таго ж калі я пачаў час ад часу праходзіць каля тых дубоў, дзе назіраў аншлагі розных птушак мінулай восенню, гэтай нікога там не бачыў. Ажно мне пашанцавала і ў пачатку кастрычніка сярод нешматлікага рознакаляровага апалага лісця пад дубамі няспешна хадзіў малады вялікі голуб!

Я ўжо ведаў што ён там робіць і пачаў здымаць як голуб шукае, выбірае і праглынае жалуды:

Пры мне ён з’еў не больш за 5 жалудоў, але я не ведаю колькі іх было да мяне. На жаль, у яго бок бег сабака і голуб вырашыў прыпыніць вячэру і ўзляцеў. Аднак, напэўна, яшчэ меў надзею працягнуць спажыванне жалудоў і сеў на адну з дубовых галін, адкуль пазіраў што робіцца ўнізе. Пачало змяркацца і я вырашыў не чакаць працягу. Тым больш калі галубы ўжо ‘адкрылі сезон жалудоў’, я змагу без праблем зняць іх у наступныя дні. Але насамрэч гэта атрымалася не так проста як я думаў…

Працяг ТУТ

Гродна, 03-10-2023

Аўтар – Дзьмітры Вінчэўскі