Пенсільванія: сотні тысяч даляраў каб паглядзець рэдкую птушку

Выпадковы залёт чорнаспінай авяльгі (Icterus abeillei) – мексіканскага эндэміка – ў сельскую мясцовасць штата Пенсільванія (ЗША) прынёс мясцовай эканоміцы амаль 225 тысяч даляраў дзякуючы таму, што мноства бёдуотчараў зляцелася паглядзець на рэдкую птушку.

Каманда аўстралійцаў з універсітэту Новага Паўднёвага Уэльса (UNSW) і іншых навуковых установаў Сіднэя зрабіла першую ў Свеце колькасную ацэнку уздзеяння на мясцовую эканоміку выпадкова заляцелай далёка ад гнездавога арэалу – бо аж 5 тысяч км - цікавай для бёдуотчараў птушкі.

"Больш за 1800 бёрдэраў з ЗША і Канады прыляцелі паглядзець на чорнаспіную авяльгу, якая была адзначана ў прадмесцях аднаго з пенсільванскіх паселішчаў ў студзені 2017 году” – сказаў адзін з сааўтараў публікацыі, аспірант Корэй Калахан (Corey Callaghan)."Птушка заставалася там 67 дзён, да 10 красавіка, і мы ацанілі штодзённы прыбытак мясцовай эканомікі ў сярэднім ў 3000 даляраў як вынік падарожжаў, харчавання, начлегу і авіяпералётаў экатурыстаў”.

Другі для Штатаў залёт віду і параўнальна доўгая магчымасць назіраць цікавую птушку далі гаспадарам падворку ў графстве Berks завесці спецыяльную Кнігу гасцей, а эканамістам з Аўстраліі апытаць многіх бёрдэраў наконт іх расходаў на паездку за птушкай.

“Мне заўсёды было цікава: колькі грошай прыносяць мясцовым людзям тыя сотні бёрдэраў, якія прылятаюць спецыяльна паглядзець на падобных птушак недзе ўдалечыні ад дому” – сказаў Калахан, сам актыўны бёрдэр. "Чорнаспіная авяльга дала магчымасць больш даведацца пра гэта і паказала колькі людзей гатовы заплаціць за падобную паездку. А падобныя цікавыя залёты адбываюцца час ад часу па ўсяму Свету”.

Вынікі даследавання былі апублікаваныя ў часопісе Human Dimensions of Wildlife.

Добра вядома, што назіранні птушак – добры бізнэс і паводле дадзеных United States Fish and Wildlife Service, штогод толькі ў ЗША на гэтае хобі людзі трацяць да 40 мільярдаў даляраў!

Паводле www.rarebirdalert.co.uk (тэкст і здымкі) падрыхтаваў Дзьмітры Вінчэўскі

На гэтую тэму:

Як птушка з Амерыкі “падымае” эканоміку Эстоніі

Кожны пяты амерыканец – бёдуотчар!

Назіранні за птушкамі неабходныя для нашага душэўнага здароўя

Назіранні за птушкамі ў ЗША ў лічбавую эру

Рэкордны Вялікі год: першы погляд ад першай асобы + VIDEO

Інтэрв’ю з Чэмпіёнам, які адзначыў 6833 віды птушак за свой Вялікі год