Вясковыя ластаўкі і 'дзіравы рот'

Пасля чарговага моцнага ліўня на агароджы былога піўзавода ў цэнтры горада з'явіліся маладыя вясковыя ластаўкі (Hirundo rustica). 

Прычым 6 асобін побач адна з адной - яўна з розных вывадкаў. Як іх адрозніваюць дарослыя птушкі і ці адрозніваюць сваіх ад чужых - не ведаю. Можа ўсе дарослыя кормяць усіх птушанят, якія знаходзяцца побач з іх былым гняздом?

Зразумела, што птушаняты калі і адрозніваюць сваіх бацькоў ад чужых, не паказваюць гэтага і просяць карміць іх усіх, хто з ластавак пралятае побач. Крычаць - справа гэта няхітрая, авось нехта і пакорміць)

Цікава, што дарослыя птушкі пры мне насілі толькі параўнальна вялікую здабычу - розных стракозаў. Звычайна яе атрымлівае той з птушанят, які першым акажацца на шляху бацькоў і своечасова раскрые дзюбу. Аднак не ў гэты раз: нешта з першым малым не спрацавала і страказу, пасля першай няўдалай спробы засунуць яе ў дзюбу першаму, атрымаў другі - гл. здымкі ніжэй. 

Не так лёгка, аказваецца, нават з'есці тое, што для цябе зловяць, прынясуць і нават пакладуць у дзюбу) Усяму трэбавучыцца.

06-07-2021, Гродна

Аўтар - Дзьмітры Вінчэўскі