Сярэдні дзяцел шукае новае дупло?

Дакументацыйныя здымкі і відэа

Гэта быў сонечны восеньскі дзень і я загадзя пачуў ціхенькае пастукванне нейкага дзятла перад і над сабой. Прыгледзеўшыся, я знайшоў яго высока на старой таполі. Дзяцел аказаўся сярэднім (Dendrocopos medius).

Нічога незвычайнага ў яго пошуках харчавання не было, ажно пакуль ён не зляцеў значна ніжэй на старую вярбу і на вышыні каля метра пачаў пашыраць уваход ў патэнцыйнае дупло, якое ўтварылася натуральным чынам з-за згнілай галіны:

Магчыма  ўнутры справа пайшла б хутчэй (калі хаця б частка драўніны там і сапраўды гнілая), але вось уваход-ляток быў замалы дыяметрам і хутка пашырыць яго яўна не атрымлівалася, хаця нейкія кавалкі дзяцел рэгулярна там адбіваў-адрываў. І тут здарылася другая нечаканая для мяне падзея - птушка пераляцела амаль вертыкальна ўверх. Але не на дрэва, а на ..бетонны слуп! З самага верху яго была параўнальна вялікая (і ўжо гатовая!) дзірка, праз якую уваходзілі ці наадварот, заходзілі ў слуп правады.  Праверка той дзіркі на адпаведнасць патрабаванням даволі хутка скончылася і дзятлу прыйшлося вярнуцца ўніз, да пашырэння лятка ў вербавым дупле)

Гродна, 05-11-2025

Аўтар - Дзьмітры Вінчэўскі