Старая яблыня і яе птушкі

Чарговым вясновым днём я праходзіў каля агароджанага непразрыстай сеткай будаўнічага ўчастка, які адным бокам суседнічаў са скверыкам, а другім, з яшчэ не засыпанай камянямі і пяском дзікай расліннасцю з невялікай сажалкай - з рачным партом. Адтуль я пачуў вясёлую пераклічку чорнагаловых шчыгелаў і вырашыў зазірнуць праз адчынены праезд для грузавікоў. І пасля гэтага застаўся там на наступныя дзве гадзіны)

'Вінаватая' ж у гэтым была старая раскідзістая яблыня на суседнім участку і мясцовыя птушкі, якія наведвалі гэтае дрэва. Яблыня гэтая знаходзілася як раз насупраць уезду на будпляцоўку і хаця акрамя як памерамі кроны і мноствам ужо распушчаных і яшчэ не кветак сярод іншых дрэваў у наваколлі не вылучалася ні вышынёй, ні шырынёй ствала, чамусці на яе прыляталі ўсё новыя і новыя віды птушак, якіх я і стараўся здымаць у незвычайным абрамленні кветак і бутонаў. 

І хаця ўсё пачалося з-за шчыгелаў, менавіта іх я на яблыні так і не зняў - яны пакупаліся і абсохлі (з песнямі), на вербах побач. І яшчэ не сфоткаў на дрэве звычайную рудахвостку, самец якой прысеў пад яблыняй, але хутка знік. Усе ж іншыя 12 відаў бачныя на здымках ніжэй і частка з іх карысталася яблыняй каб бяспечна абсохнуць пасля купання ў сажалцы, частка на ёй спявала, іншыя ж адпачывалі ці шукалі ежу. І гэта, па парадку і ніжэй на здымках:

Звычайны шпак

сіняя сініца

пярэстая валасяніца

леска-чарнагалоўка (самец)

зелянушка (самец)

палявы верабей

вялікі голуб

дамавы верабей (самец)

канаплянка (самец)

берасцянка (самец)

малінаўка

еўрапейскі ўюрок (самец).

Вельмі магчыма, што калі б застаўся насупраць яблыні даўжэй, гэты спіс яшчэ б павялічыўся. Але ўсё атрымалася яшчэ цікавей прыкладна праз месяц, калі да нас даляцелі адны з самых позніх мігрантаў. І пра іх будзе асобная гісторыя.

Гродна, 30-04-2026

Аўтар - Дзьмітры Вінчэўскі