Самка вялікага кулёна (Numenius arquatа) усталявала новы рэкорд працягласці жыцця віду на Брытанскіх астравах. Птушка, якая была акальцавана птушанём на востраве Brownsea у графстве Dorset (паўднёвы захад Англіі) у верасні 1992 г., назіралася сёлета у пачатку сакавіка ў мясцовасці New Forest на поўдні Англіі і такім чынам жыве ўжо 33 гады і 8 месяцаў.
Папярэдні рэкорд быў усталяваны ў 2011 г. і цяпер павялічаны больш чым на год.
Выніковае назіранне атрымалася зрабіць дзякуючы камбінацыі каляровых калец, якія навукоўцы, разам са спадарожнікавым перадатчыкам, павесілі ў 2022 г. на пераадлоўленую ў New Forest самку. Яе назвалі Mrs Ogdens, па назве вёскі ў Fordingbridge, дзе злавілі. Тым летам з дапамогай рэйнджэраў з Forestry England, якія манітораць гнездаванне вялікіх кулёнаў, гэтая самка, ва ўзросце 29 гадоў, паспяхова выгадавала адно птушанё.
Пасля гэтага перамяшчэнні птушкі адсочваліся і яна праводзіла сакавік і красавік у пойме Avon, гнездавала ў New Forest і зімавала ў Brand's Bay і на Studland Heath (абедзве мясцовасці знаходзяцца ў графстве Dorset ). Яе спробы гнездавання ў 2023 і 2024 гг. скончыліся няўдачай.
Mike Short, прадстаўнік GWCT, сказаў: "Гэта паказвае нам, што нават у такім занятым і змененым чалавекам асяроддзі як тут на поўдні Англіі, можна мець адпаведныя ўмовы для размнажэння дзікіх вялікіх кулёнаў, якія могуць паспяхова гнездаваць нават ва ўзросце 29 гадоў”.
Flo Blackbourn з Curlew Action дадаў : "Новы рэкорд працягласці жыцця вялікага кулёна неверагодны і нагадвае нам як доўга гэтыя птушкі могуць жыць побач з намі. Тым не менш, іх доўгажыхарства маскіруе крызіс у іх ахове, таму што з іх гнёздаў вылятае замала птушанят каб колькасць віду заставалася стабільнай.
Толькі за апошнія 25 гадоў папуляцыя віду ў Злучаным каралеўстве зменшылася прыкладна напалову. Каб змяніць гэты адмоўны трэнд, неабходныя тэрміновыя дзеянні ‘на зямлі’ з яснай падтрымкай палітычных зменаў. Гэта і было асноўнай мэтай новага Плана дзеянняў па захаванні вялікага кулёна ў Вялікабрытаніі (UK Curlew Action Plan), які быў прыняты ў студзені гэтага году.”
Паводле www.birdguides.com падрыхтаваў Дзьмітры Вінчэўскі
Здымак Уладзіміра Янушэвіча
На гэтую тэму:
Самая старая дзікая птушка ізноў прыляцела размнажацца, ёй не менш 75 гадоў
Двум крыўкам, адзначаным жывымі ў Англіі, больш за 40 гадоў!
Самы стары ў Свеце сярэдні кулён паходзіць з Шэтландзкіх астравоў
Самы знакаміты кулік “налятаў” ужо 400 тысяч км !
Самая старая белашчокая казарка размяняла чацвёрты дзесятак
- Увайдзіце ці зарэгіструйцеся каб пакідаць каментары.
КАМЕНТАРЫ