Недалёка ад межаў Беларусі адзначана вялікая туркаўка

Раніцай 8 лютага 2013 r. у некалькіх кіламетрах ад беларускай мяжы ў польскай мясцовасці Lipnica (Бельскі павет) у гушчыні хмызу недалёка ад невялікага вадаёму быў заўважаны незвычайны голуб.

Акрамя назіранняў праз бінокль і трубу на працягу каля 10 хвілін, атрымалася таксама зрабіць некалькі дакументацыйных здымкаў гэтага галуба, які аказаўся вялікай туркаўкай (Streptopelia оrientalis), хутчэй за ўсё, намінальнага падвіду. Каля туркаўкі не было іншых птушак, і праз нейкі час яна адляцела ў паўночным кірунку.

Вялікая туркаўка памерамі большая за звычайную туркаўку, на якую яна найбольш падобная. Акрамя гэтага, вялікая туркаўка мае сілуэт, які найбольш пасуе галубам з роду Columba: параўнальна невялікую галаву, масіўнае цела і кароткі хвост. Ёсць адрозненні і ў афарбоўцы пер’я шыі і падхвосця.

Арэал вялікай туркаўкі знаходзіцца практычна па ўсёй Азіі, дзе яна даволі звычайны від і займае самкнутыя дрэвастоі побач з адкрытымі мясцінамі і рачнымі далінамі. Толькі два падвіды (S. o. orientalis i S. o. meena) з шасці вандроўныя. У Еўропе від адзначаны ў многіх краінах, галоўным чынам з кастрычніка па сакавік.

Да 2000 г. на нашым кантыненце вялікую туркаўку адзначылі 46 разоў, галоўным чынам у скандынаўскіх краінах. Для Польшчы гэта другая рэгістрацыя віду. Першы выпадак адбыўся пад Гданьскам, дзе з 11 па 19.04.2002 r. дарослая туркаўка трымалася вялікай фермы і харчавалася там разам з кольчатымі туркаўкамі.

У Беларусі вялікая туркаўка не адзначалася.

Паводле www.bocian.org.pl (тэкст і здымак) падрыхтаваў Дзьмітры Вінчэўскі для www.birdwatch.by

На гэтую тэму:

В Списке птиц Беларуси официально появились 3 новых вида: Протокол заседания БОФК от 16.01.2013