Кулік-лопацень: добрыя і кепскія навіны пра адну з самых рэдкіх птушак

У нядзелю, 4 ліпеня, навуковая экспедыцыя, якую фундавала кампанія Heritage Expeditions, знайшла дагэтуль невядомае месца гнездавання адной з самых рэдкіх птушак на Зямлі – куліка-лопатня (Calidris pygmeus), агульная колькасць якога ацэньваецца не больш, чым у 100 пар і які мае статус крытычна пагражаемага віду.

Звычайна кампанія, якая займаецца арганізацыяй тураў для бёдуотчараў і не толькі ў самыя розныя мясціны на Зямлі: ад Арктыкі да Антарктыкі, запрашае ў экспедыцыю па вывучэнню і ахове гэтых кулічкоў – эндэмікаў Чукоткі – невялікую колькасць заходніх бёдуотчараў, якія фактычна і аплочваюць амаль усе расходы па лагістыцы і жыццю на ўзбярэжжы Чукоцкага мора ўсіх удзельнікаў экспедыцыі.

Усяго ў невядомым да гэтага месцы атрымалася адзначыць 8 дарослых птушак – гэта неверагодна пазітыўная навіна для захавання віду. Аднак яна была азмрочаная іншай, якая сёння стала вядома ад каманды па рэнтрадукцыі віду Spoon-billed Sandpiper Recovery Team: два маленькіх кулічка-лопатня, якія ўпершыню вылупіліся ад бацькоў у няволі ў інкубатары Водна-балотнага цэнтру WWT (Вялікабрытанія), пражылі троху больш за суткі.

Птушкі, якія ўтрымліваюцца ў Цэнтры, адклалі 7 яек, з якіх толькі два аказаліся заплодненымі. Першы кулічок вылупіўся 2 ліпеня і даволі хутка стала зразумела, што ён наўрацці пражыве доўга. Наступнае птушанё вылупілася 3 ліпеня і выглядала здаровым. Аднак негледзячы на 24-гадзіннае назіранне і клопат экспертаў раптам заснула і непраснулася. Прычыны смерці птушанят застаюцца невядомымі, аднак спецыялісты рыхтуюць пасмяротнае ўскрыццё абодвух лопатняў.

Гэтыя сумныя выпадкі звялі фактычна на ноль усе папярэднія шасцігадовыя высілкі, якія каманда з WWT прыкладала, каб стварыць невялічкую папуляцыю з 23 птушак для размнажэння ва ўмовах няволі і далейшага выпуску (рэінтрадукцыі) падрослых птушанят у прыроду на Чукотцы. Меркавалася, што птушкі ў пітомніку стануць своесаблівым “Ноевым каўчэгам” для крытычна пагражаемага віду, які будзе папаўняць патомствам знікаючую дзікую папуляцыю.

Што і як рабіць далей, каб выратаваць від ад знікнення, цяпер становіцца менш зразумелым.

Update:

Ну вось і добрыя навіны! 30 птушанят лопатня паспяхова вылупіліся сёлета ў інкубатары на Чукотцы!

Паводле www.heritage-expeditions.com і www.wwt.org.uk (тэкст і фота) падрыхтаваў Дзьмітры Вінчэўскі

На гэтую тэму:

Першыя кулічкі-лапатні вылупіліся ў няволі

ДЗЕТКІ Ў АБАРОНУ КУЛІКА-ЛАПАТНЯ = JOURNEY OF SPOON-BILLED SANDPIPER - VIDEO

Папуляцыі кулікоў змяншаюцца хутчэй чым калі-небудзь да гэтага

ПЕРААЦЭНКА КОЛЬКАСЦІ І СТАТУСУ: НА ЗЯМЛІ 10 425 ВІДАЎ ПТУШАК, КОЖНЫ 6-Ы ПАД ПАГРОЗАЙ ЗНІКНЕННЯ

Тэхналагічны прарыў – знікаючая птушка вылупілася з яйка курыцы

Больш за 80% пераадкрытых відаў жывёл знаходзяцца пад пагрозай канчатковага знікнення

БЛАКІТНЫ АРА ЎПЕРШЫНЮ Ў НАШЫМ СТАГОДДЗІ АДЗНАЧАНЫ Ў ПРЫРОДЗЕ!