Сокал-пустальга выходзіць на вялікі экран

Не, пакуль што ніхто не стварыў ні мастацкага, ні дакументальнага фільма з сакаламі гэтага віду ў галоўнай ролі. Але Птушка 2010 года ў Беларусі сапраўды стала вельмі папулярнай. У першую чаргу – дзякуючы он-лайн трансляцыі з гнязда сакалоў, якую можна 24 гадзіны на суткі глядзець на нашым сайце тут: http://birdwatch.by/pustalga_brest
Для таго, каб паглядзець на нашых птушак, на гэтую старонку заходзілі жыхары ўжо 77 краінаў Свету, апошнімі далучыліся грамадзяне далёкага Сінгапуру. Беларусы пакуль не выглядаюць занадта актыўнымі – з амаль 9 тысяч наведвальнікаў менавіта он-лайн трансляцыі іх толькі трошкі больш 18%. Наперадзе з вялікім адрывам лідзіруюць нашы заходнія суседзі палякі – 60% ад усіх наведвальнікаў!

На жаль, па тэхнічных прычынах мы не змаглі падключыць да сервера і вывесці на наш сайт трансляцыю з яшчэ аднаго гнязда сакалоў, якое пустальгі зрабілі на касцёле Ўзнясення Святога Крыжа (Бернардынскага) ў Гродна. Але там таксама ўвесь час працуе ўэб-камера і мы запісваем усё, што адбываецца. Самыя цікавыя моманты дзякуючы фільмікам і здымкам, якія рэгулярна абнаўляюцца, можна глядзець у раздзеле Нашы назіранні. 
Для таго, каб больш наблізіць жыццё сокалаў менавіта да гарадзенцаў, з панядзелка, 24 мая, некалькі разоў на дзень на самым вялікім экране ў горадзе на цэнтральнай Савецкай плошчы тэлерадыёвяшчальны канал “Гродна Плюс” будзе паказваць фільмікі, зробленыя ўэб-камерай на гняздзе сакалоў на касцёле.
Акрамя кароценькага прадстаўлення птушак як віду, занесенага ў Чырвоную кнігу Беларусі і серыі фільмікаў з розных этапаў жыцця сакалінай сям’і, якія будуць увесь час абнаўляцца, бягучым радком будзе ісці інфармацыя пра тое, што сокалы загнездавалі ў нашым горадзе на касцёле бернардынцаў і пра тое, што он-лайн пустальгу можна глядзець на нашым сайце.
Дзякуючы Аляксандру Ласмінскаму, дырэктару Тэлерадыёвяшчальнага канала “Гродна Плюс” і дапамозе Віталія Гуменнага, сябра Савету Гродзенскага абласнога аддзялення АПБ, нашы сокалы сапраўды вылятаюць на шырокі экран! Шчыры ім дзякуй!

Дзьмітры Вінчэўскі,
Гродзенскае абласное аддзяленне АПБ
Фотамантаж аўтара