Шчыгелы, яліны і павуцінне

Я ўжо пісаў ТУТ раней пра цудоўныя, хаця і не вельмі старыя яліны ў мястэчку Канюхі. У савецкі час іх пасадзілі перад школай , клубам і сельсаветам і цяпер тут рай для розных птушак.

Па-першае, у іх зручна хаваць гняздо, па другое, з іх выступаючых ва ўсе бакі і на рознай вышыні галін зручна спяваць, па трэцяе, навокал хапае ежы і для насякомаедных відаў, і для насеннеедных. Ну і матэрыялу для гнёздаў, вядома.

Адны з насельнікаў гэтых ялін - чорнагаловыя шчыгелы (Carduelis carduelis). Яны пастаянна спявалі на розных дрэвах - яно і зразумела, яліны знаходзяццца побач адна з адной і самцам прыходзіцца спяваць кожны са сваёй. Каб нагадаць іншым, што менавіта ў гэтай усё ўжо занята)

Думаю, што шчыгелаў там ад 3 да 5 пар. Адна з пар заканчвала пабудову гнязда. Калі больш дакладна, гняздо ўжо было збудаванае і адна з птушак ужо сядзела ў ім, а другая пры нас адляцела метраў 20 да будынка школы, дзе з хвіліну збірала ля фундаменту параўнальна вялікія кавалкі старога павуціння. Зразумела, што яно адразу пайшло на "аддзелку" гнязда)

Бераставіччына, 04-05-2021

Аўтар - Дзьмітры Вінчэўскі

__________________________