Белая сава ў Гішпаніі: патройная сенсацыя

Тры белыя савы (Bubo scandiacus), адзначаныя ў Гішпаніі за апошнія 10 дзён, сталі не толькі трыма першымі рэгістрацыямі віда ў краіне за ўсю гісторыю арніталагічных назіранняў, але і стварылі самы вялікі рух твітчараў невядомага дагэтуль для Гішпаніі маштабу.

Першая сава, малады самец гэтага году, быў знойдзены ледзь жывы на паўночным узбярэжжы краіны каля мясцовасці Santander, Cantabria, 8 лістапада. Яго паспелі яшчэ жывым перадаць у рэабілітацыйны цэнтр, але пазней ён памёр. Каб зразумець адкуль ён, для ізатопнага аналізу былі ўзяты пер’я.

Праз два дні, 10 лістапада, прыкладна ў 150 км ад першай савы была адзначаная другая – самка першага году жыцця. Яна таксама была заўважана на ўзбярэжжы, у мясцовасці Moniello, Asturias. Праз тыдзень яна пераляцела ў мяцовасць Cabo de Peñas і ўся яшчэ знаходзіцца там.

Здавалася б, што можа стаць яшчэ большай сенсацыяй, чым 2 першыя белыя савы для краіны на працягу толькі 3 дзён? Яшчэ адна!

І сапраўды - яшчэ адзін малады самец першага году жыцця прыляцеў ў тую ж мясцовасць Cabo de Peñas 13 лістапада і на наступны дзень пераляцеў у Verdicio. Найбольш праўдападобным тлумачэннем з’яўлення соваў амаль у той самай мясцовасці на сёння з’яўляецца меркаванне, што яны паходзяць з Неарктыкі – гэта значыць, што іх радзіма – Арктыка Паўночнай Амерыкі, а не Еўропы ці тым больш Азіі. Аднак птушкі хутчэй за ўсё пераадолелі Атлантычны акіян не самастойна, а з дапамогай таго самага ці розных караблёў, якія рэгулярна курсуюць паміж Паўночнай Амерыкай і Еўропай - у 15 км ад месца першай рэгістрацыі двух апошніх птушак у правінцыі Астурыя знаходзіцца вялікі порт El Musel.

У Беларусі апошні залёт белай савы быў зарэгістраваны 01-03-2012 г.  на поўначы краіны.

Паводле www.birdguides.com падрыхтаваў Дзьмітры Вінчэўскі

Здымкі з Rare Birds in Spain

На гэтую тэму:

Белыя совы сігналяць суродзічам сваёй белізной

Белая сава прызнаная відам, якому пагражае рэальнае знікненне

Інвазія шчуркоў на поўдзень адбываецца ў Скандынавіі