Цуд на Каляды: злапаны новы для Літвы від птушак

Сёння літоўскія арнітолагі павялічылі Спіс птушак Літвы яшчэ на адзін, але вельмі незвычайны для нашых мясцінаў від. На арніталагічнай станцыі Ventės Ragas, дарэчы, заснаванай яшчэ ў 1929 годзе нашым земляком праф. Тадэвушам Іваноўскім (Tadas Ivanauskas), Вітаўт Эйгірдас (Vytautas Eigirdas) злапаў чорнагорлую завірушку (Prunella atrogularis).

Гэта – азіяцкі від, распаўсюджаны ад Казахстана да заходняга Кітая і ад Паўночнага Уралу да Алтайскіх гор Расіі, які звычайна зімуе ў Індыі, Пакістане і Паўднёва-Усходняй Азіі або ў межах гнездавога арэалу, аднак часам выпадкова залятае ў Еўропу і быў адзначаны ў некалькіх заходнееўрапейскіх краінах.

Такім чынам, калі ўсе новыя сёлетнія віды будуць прызнаныя фауністычнай камісіяй Літоўскага арніталагічнага таварыства, спіс птушак гэтай краіны павялічыцца ажно на пяць відаў: у студзені тут быў адзначаны стэпавы жаўрук (Melanocorypha calandra), ў траўні - ціхаакіянская залацістая сеўка (Pluvialis fulva) і кучаравы пелікан (Pelecanus crispus), у чэрвені – пагоніч-крошка (Porzana pusilla) і вось цяпер – чорнагорлая завірушка.