Шпакі і вылет насякомых: пір перад пацяпленнем

Гэтай вясной ужо было столькі пахаладанняў і пацяпленняў, што цяжка іх усе запомніць. Але адно з нядаўніх мне атрымалася, бо дапамаглі ў гэтым ... шпакі (Sturnus vulgaris))

Як яны знаходзяць здабычу там, дзе расліннасць кароткая або яе зусім няма, я раней паказваў ТУТ.

А вось калі трава адрастае і ўжо роўная іх росту і вышэй, яны не вельмі любяць харчавацца ў такіх месцах. Самая галоўная прычына, напэўна, меншая бяспека - драпежнік з паветра (шуляк-карагольчык або нават сокал-пустальга) ці з зямлі (коцік) можа быць зўважаны запозна, нават калі шпакоў харчуецца некалькі ці некалькі дзесяткаў побач.

Іншая магчымая прычына - можа быць, што ў такіх месцах земляныя чарвякі і лічынкі насякомых апускаюцца трошкі ніжэй ў глебе ці карані расліннасці становяцца больш шчыльнымі і даставаць здабычу адтуль становіцца цяжэй.

Так ці інакш, але калі я заўважыў 'паляванне' шпакоў у адрослай траве, адначасова ў той жа дзень адбыўся падвойны вылет нейкіх мурашоў і нейкіх камароў. Было іх шмат, яны круціліся ў паветры вакол любой расліннасці ад травы да высокіх дрэваў і сядзелі на ёй.

Грэх было шпакам не скарыстаць такі вылет “ежы”, вядома, зусім дробнай, але масавай і вельмі даступнай, таму птушкі хадзілі і бегалі, збіралі яе і групамі, і паасобна. Некаторыя адляталі з поўнымі дзюбамі на другі бераг ракі - карміць птушанят, аднак большасць проста харчавалася халяўнымі насякомымі. Тым больш, было холадна і энергія патрабавалася проста каб харчавацца.

А на наступны дзень стала цёпла. Мурашак і камароў стала яўна менш і шпакі вярнуліся да свайго звычайнага прачэсвання 'газонаў' з дпамогай дзюбы.

Гродна, 28-04-2021

Аўтар - Дзьмітры Вінчэўскі

__________________________