Паляўнічы, які забіў фламінга над Мальтай, атрымаў турэмны тэрмін

Даўно мінулі часы, калі з-за недахопу жывёльнага бялка жыхары краін Міжземнамор’я масава забівалі для ежы птушак-мігрантаў. Недахопу ў ежы ў рэгіёне няма як мінімум апошнія 50-70 гадоў, але маштабныя забойствы пралётных і зімуючых там птушак працягваюцца і легальна, і нелегальна. На жаль, гэта традыцыі, якія пакуль немагчыма цалкам перамагчы. Аднак мясцовыя прыродаахоўныя таварыствы змагаюцца з іх носьбітамі, і часам паспяхова.

Прадстаўнік таварыства BirdLife Malta заявіў, што яны задаволены судовым выракам, які атрымаў мясцовы паляўнічы за забойства ў кастрычніку 2021 году 4 ружовых фламінга ў мясцовасці Qawra Point. Ён быў прызнаны вінаватым і атрымаў гадавы турэмны тэрмін, яго паляўнічая бронь была канфіскаваная, паляўнічая ліцэнзія дажыццёва ануляваная, таксама яго пазбавілі магчымасці калі-небудзь у будучыні атрымаць дазвол на валоданне якой-небудзь агнепальнай зброяй. Між іншым гэта азначае, што гэты чалавек больш не зможа легальна паляваць.

Адзін з бёрдуотчараў 2 кастрычніка 2021 г. патэлефанаваў у паліцыю (Malta Police Force) і ў BirdLife Malta, што стаў сведкам забойства 4 фламінга. Пакуль прадстаўнікі таварыства і паліцыі дабіраліся на месца злачынства, бёрдуотчар зрабіў відэа, якое разам са знойдзенымі трупамі забітых птушак і паслужыла пераканаўчымі доказамі ў справе.

Акрамя гэтага, значна большым поспехам можна лічыць нядаўняе стварэнне прыроднага рэзервата з забаронай там палявання ў мясцовасці Qawra Point, абвешчанне Урадам пасля звароту BirdLife Malta і сумнага мінулагодняга выпадку з нелегальным паляваннем.

Паводле www.birdlifemalta.org (тэкст і здымак) падрыхтаваў Дзьмітры Вінчэўскі

На гэтую тэму:

Вясновае паляванне на птушак застанецца на Мальце легальным?