Старыя арлы могуць мігрыраваць у горшых умовах, чым маладыя

Новае даследаванне раскрыла нечаканыя аспекты міграцыі арлоў-маркутоў (Aquila chrysaetus) у Паўночнай Амерыцы, знойдзеныя дзякуючы выкарыстанню сучасных тэхналогій.

Звычайна міграцыя- адзін з самых цяжкіх перыядаў у жыцці многіх відаў птушак і зразумела, што яны стараюцца аптымізаваць яе. Таму было вялікім сюрпрызам адкрыць, што больш старыя і дасведчаныя арлы-маркуты мігрыруюць у больш цяжкіх умовах надвор’я і менш часу праводзяць “на зямлі”, чым маладзейшыя і менш дасведчаныя птушкі. Аднак магчыма, што гэта мае важкую прычыну – старэйшыя арлы максімальна па часе прыстасоўваюцца да гадавання новага пакалення.

Каманда навукоўцаў выкарыстала трэкі з GPS-перадатчыкаў амаль 90 арлоў-маркутоў з усходу Паўночнай Амерыкі і параўнала даты міграцый, узрост птушак і ўмовы надвор’я. Не было здзіўленнем, што птушкі ляцелі хутчэй і на большыя адлегласці калі мелі спадарожны вецер і пагоду на сваім шляху з магчымасцю карыстацца тэрмікамі (узыходзячымі патокамі паветра). Аднак старэйшыя птушкі выкарыстоўвалі менш падыходзячыя ўмовы для далейшых пералётаў і таму мігрыравалі агулам больш павольна.

Навукоўцы тлумачаць, што дарослыя птушкі вымушаныя пачынаць сваю адваротную вясновую міграцыю на поўнач раней, таму што імкнуцца заняць там найлепшыя тэрыторыі для размнажэння і вымушаныя часам ляцець у зусім неспрыяльных для гэтага умовах. “Тады як маладыя арлы не патрабуюць уласных тэрыторый, каб пражыць лета і таму ляцяць толькі тады, калі умовы для пералётаў лунаючым палётам найлепшыя” – кажа Тодд Кацнэр (Todd Katzner), адзін з даследчыкаў.

Акрамя таго, большы жыцёвы досвед старых птушак дапамагае ім паспяхова ляцець нават у неспрыяльных умовах ранняй вясны ці позняй восені- пасля таго, як іх патомства ўжо стане больш самастойным.

Крыніца:

Rus A I, Duerr A E, Miller T A, Belthoff J R & Katzner T E. 2017. Counterintuitive roles of experience and weather on migratory performance.The Auk: July 2017, Vol 134 - 3, pp 485-497, doi: http://dx.doi.org/10.1642/AUK-16-147.1

Паводле www.birdguides.com падрыхтаваў Дзьмітры Вінчэўскі

Здымак Алы Эрдман

На гэтую тэму:

Перамога арлоў і арланаў: суд у ЗША адмяніў “правіла 30 гадоў”

Найстарэйшы арол знойдзены мёртвым

Міграцыі ўкарачваюць жыццё птушак

Стэпавы арол пад наглядам спадарожнікаў

Арлы, спадарожнікі і ветракі

Арнітолаг атрымаў 2,5 мільёны эўра прэміі для працягу вывучэння міграцый

Эпічныя міграцыі палярных крычак пацверджаны сучаснымі тэхналогіямі