Апісана самая вялікая птушка на Зямлі - яна жыла на Мадагаскары

Пасля дзесяцігоддзяў спрэчак, каманда навукоўцаў з Заалагічнага таварыства Лондана (Zoological Society of London (ZSL) нарэшце вызначыла I апісала самую вялікую птушку, якая калі-небудзь жыла на нашай планеце. Гіганцкая птушка атрымала таўталагічную назву - Vorombe titan (што значыць “вялізарная птушка” на мальгашскай і грэцкай мовах).

Гэтыя птушкі маглі быць распаўсюджаныя на Мадагаскары нават яшчэ ў гістарычны час, былі да 3 метраў вышынёй і важылі прыкладна 800 кг!

Да гэтага часу меркавалі, што ў двух радах т.зв. сланоўіх птушак магло быць нават да 15 відаў. Навукоўцы з ZSL параўналі і прамералі сотні костак, якія знаходзяцца ў розных музейных калекцыях па ўсяму свету. У выніку яны аб’ядналі 4 віды ў тры роды. Гэта першы падобны перагляд таксанаміі сямейства Aepyornithidae за апошнія 80 гадоў.

Сямейства аб’ядноўвае гіганцкіх нелятаючых птушак з Мадагаскара, якія жылі там прыкладна з позняга чацьвяртычнага перыяду. Раней вылучалі два рады: Aepyornis і Mullerornis. Першы апісаны від - Aepyornis maximus, лічыўся самай вялікай птушкай на Зямлі. Аднак пазней, у 1894 годзе, брытанскі палеантолаг C.W. Andrews апісаў нават большы памерамі від - Aepyornis titan, але многімі ён лічыўся толькі незвычайна вялікім прадстаўніком A. maximus. Цяпер навукоўцы з ZSL прыйшлі да той жа высновы, што і Эндрус – ён сапраўды апісаў асобны від. Не толькі з-за вялікіх памераў, але і з-за параўнальна вялікіх адрозненняў у форме знойдзеных костак птушкі, яе аднеслі да новага роду Vorombe.

Д-р Джэймс Гансфорд (Dr. James Hansford) сказаў: “Сланоўі птушкі былі найбольшымі прадстаўнікамі мадагаскарскай мегафауны, пра якіх мы ведаем. І іх значэнне для мясцовых экасістэм было большым, чым лемураў. Гэтак было таму, што вялікія памерамі птушкі кантралявалі расліннасць праз яе спажыванне і стратыфікацыю насення, якая адбывалася пасля праходжання яго праз іх стрававальны тракт. Таму востраў адчувае знікненне гэтых птушак дагэтуль”.

Сааўтар публікацыі і калега па ZSL прафесар Самуэль Тарві (рrof. Samuel Turvey) дадаў: “Без дастатковага разумення ранейшай біяразнастайнасці мы не зможам дастаткова поўна зразумець эвалюцыю ўнікальных экасістэм вострава і зразумець што і чаму знікла на Мадагаскары пасля прыбыцця туды чалавека. Не атрымаецца і правільна вызначыць як найлепш ахоўваць пазасталыя на востраве віды”.

Крыніца:

Unexpected diversity within the extinct elephant birds (Aves: Aepyornithidae), and a new identity for the world's largest bird, Royal Society Open Science, rsos.royalsocietypublishing.or … /10.1098/rsos.181295

Паводле www.phys.org (тэкст і малюнак- рэканструкцыя мастака) падрыхтаваў Дзьмітры Вінчэўскі

На гэтую тэму: