Гарадзкое жыццё шэрых курапатак. Частка IIІ: жывыя камяні

Працяг гісторыі. Пачатак ТУТ і ТУТ

Пачатак дня быў выдатны – свяціла і нават грэла сонейка, на беразе ракі збоку ад мяне ў вербалозе спачатку затрашчаў крапіўнік, а потым нечакана выляцеў на адкрытае месца і збіраў насякомых наўпрост з паверхні вады, якая заліла зусім невысокую тут траву. І вось пад час назірання за крапіўнікам, як кажуць ‘бакавым зрокам’, я зачапіўся за два аднолькавай формы і памеру камяні, якія ляжалі зусім блізка адзін да аднаго недалёка ад вады. Гэтай сваёй аднолькавасцю ды яшчэ знаходжаннем у месцы, у якім іх, здаецца, некалькі хвілін таму іх яшчэ не было, яны і звярнулі на сябе маю ўвагу.

Хаця і былі тыя ‘камяні’ параўнальна недалёка ад мяне, я навёў на іх фотакамеру і толькі тады са здзіўленнем убачы, што гэта шэрыя курапаткі (Perdix perdix) – настолькі выдатнай была іх маскіроўка калі яны не рухаліся.

Для розных нашых відаў птушак вясна пачынаецца ў розны час, але, у асноўным, аднолькава – раней ці пазней яны аб’ядноўваюцца ў пары. Таму, хаця я за некалькі хвілін назіранняў за імі так і не ўбачыў птушак спераду, а значыць і доказаў, што гэтыя дзве курапаткі менавіта пара, але тое, як яны трымаліся разам і пачатак вясны асабліва не давалі мне падставаў сумнявацца ў гэтым. (У самца вялікая чорная падкова на грудзі, у самкі яе амаль няма, толькі невыразныя яе сляды, як бы размытыя-замыленыя ў простай праграме рэдагавання малюнкаў)

Курапаткі стараліся не аддаляцца адна ад адной і чамусьці ад месца на беразе, дзе я іх убачыў. І гэтае месца было зусім недалёка, метрах у 30, ад месца маёй папярэдняй сустрэчы са знаёмай сям’ёй, у якой тады было 8 птушак (4 самцы і 4 самкі). Таму я думаю, што гэтая пара хутчэй за ўсё як раз і паходзіць з маіх старых знаёмых курапатак.

....

Як я і чакаў, хутка адбылася яшчэ адна наша сустрэча. Але пра яе будуць асобныя гісторыі, у наступны раз.

Гродна, 09-03-2023

Аўтар – Дзьмітры Вінчэўскі

Мінулагоднія гісторыі гэтай жа (?) сям’і курапатак тут:

Прыквел і частка І, частка ІІ, частка ІІІ, частка IV, частка V, частка VI, частка VII, частка VIII, частка ІХ і Заканчэнне.