Асноўныя вынікі BirdRace-2019 + табліца з усімі адзначанымі відамі

Як звычайна адбываецца апошнія 16 гадоў, у першую суботу верасня у нашай краіне прайшоў Адкрыты чэмпіянат Беларусі па спартыўнай арніталогіі (скарочаная і больш папулярная назва – BirdRace, або гонка за птушкамі). І хаця сёлета ў спаборніцтвах удзельнічала рэкордная колькасць - 18 каманд, згодна з вынікамі рэальна “ганяліся за птушкамі” як і ў мінулыя гады, не больш 13-ці каманд.

Большасць каманд назірала птушак у Брэсцкай вобласці,нашмат менш – у Мінскай, Гомельскай і Гродзенскай. На жаль, у Віцебскай і Магілёўскай сёлета каманд не было. Вельмі радуе, што не толькі з’явіліся новыя каманды і новыя ўдзельнікі, але і “старыя” каманды і ўдзельнікі падтрымліваюць высокі ўзровень чэмпіянату.

людзі

Некаторыя з каманд сабраліся пасля Гонак на экасядзібе "Залессе".

Усталяваны ў 2017 годзе камандай “Twix” рэкорд у 126 адзначаных відаў за 12 гадзін чэмпіянату так і не быў пабіты. Усе разам каманды адзначылі каля 180 відаў птушак (гл. табліцу ў дадатку пад артыкулам). Хаця ў Табліцы 182 віды, рэгістрацыя як мінімум двух выклікае сумневы ў выпадку адсутнасці фотаздымкаў ці іншых доказаў – гэта авяльга і палявы свірстун, адзначаныя толькі адной і не вельмі дасведчанай камандай. Але і так гэта найлепшы вынік, дасягнуты за ўсе 16 гадоў правядзення гонак за птушкамі.

людзі

Каманда Птицы вокруг столицы убачыла не толькі птушак)

людзі

Каманда "Гарадзенскія United традыцыйна заканчвае Чэмпіянат у пойме Стрыеўкі.

Месцы паводле Журы чэмпіяната ў адпаведнасці з Правіламі (каманда, якая раней паведаміла пра заканчэнне назіранняў пры аднолькавай колькасці адзначаных відаў, займае больш высокае месца):

Монамур – 118 відаў (месца старту – Кобрынскі раён)
Rara Avis - 116 відаў (скончылі спаборніцтвы ў 17:53, месца старту- Бярозаўскі раён)
Troglodytes - 116 відаў (скончылі спаборніцтвы пазней каманды Rara Avis, месца старту – Любанскі раён)
Цмокі – 115 відаў (месца старту – Бярозаўскі раён)
Merlin - 114 відаў (месца старту – Пружанскі раён)
Клювокрыл – 103 віды (месца старту – Пружанскі раён)
Птицы вокруг столицы - 99 відаў (месца старту – Мінскі раён)
Берасцейскія пагонышы - 96 відаў (месца старту – Жабінкаўскі раён)
Гарадзенскія United - 90 відаў (месца старту – Гродзенскі раён)
Славки и совы - 88 відаў (месца старту – Пружанскі раён)
Четвероножек - 78 відаў (месца старту – Добруш)
Дакудаўскія лосі - 74 віды (месца старту – Лідскі раён)
Райский чик-чирик - 68 відаў (месца старту – Бярозаўскі раён)
Небольшая стая хохлатых среднеевропейских церулозавров – 48 відаў (месца старту – Мінск)
Сыч Уань - 46 відаў (месца старту – Мінск)
Кулики-затейники - 42 віды (пешшу, месца старту - Гомель)
Вандроўныя альбатросы - 32 віды (на ровары, месца старту – Мінск)
Круглые лица - 26 відаў (пешшу, месца старту – Ганцевіцкі раён)

Віншуем пераможцаў і ўсіх удзельнікаў з выдатнымі назіраннямі!

Як звычайна, у дзень правядзення Чэмпіянату адбываецца найбольш за год рэгістрацый рэдкіх відаў са Спіса Клуба200 – усяго было атрымана 19 паведамленняў пра назіранні 12 відаў!

птушка