Мэта – вынішчыць качку-інтрадуцэнта

Брытанская агенцтва па прадуктах харчавання і  даследаваннях навакольнага асяроддзя  (Food and Environment Research Agency (FERA)) апублікавала вынікі адной з самых непапулярных сваіх кампаній па ахове прыроды.  Кампанія датычыла вынішчэння на Брытанскіх астравах аднаго з амерыканскіх відаў качак-інтрадуцэнтаў – амерыканскай саўкі (Oxyura jamaicensis).

Амерыканскія саўкі былі паспяхова інтрадукаваныя ў Англіі ў 1953 г., дзе з 1960 рэгулярна размнажаюцца.
Праблема з амерыканскай саўкай заключаецца ў тым, што прадстаўнікі гэтага віду могуць скрыжоўвацца ў прыродных умовах з еўрапейскай саўкай (Oxyura leucocephala), якая на сённяшні дзень з’яўляецца адной з самых рэдкіх птушак Еўропы. Невялікая папуляцыя гэтых качак захавалася ў асноўным у Гішпаніі, дзе з пачатку 1990х гг. пачалі рэгістравацца рэгулярныя залёты амерыканскіх савак. З вялікай доляй імавернасці можна сцвярджаць, што апошнія прыляталі туды з Вялікабрытаніі. Амерыканскія саўкі сталі гібрыдызавацца з прадстаўнікамі абарыгеннага віду, тым самым ставячы пад пагрозу яго далейшае існаванне.
Кампанія па знішчэнню качак-інтрадуцэнтаў пачалася ў верасні 2005 году і скончылася  ў чэрвені 2010г. За гэты час брытанская папуляцыя амерыканскай саўкі зменшылася з прыкладна 4400 птушак да прыкладна 200. Дзякуючы падключэнню да праекту фондаў з DEFRA і EU LIFE-Nature, ён будзе працягнуты да сакавіка 2011г..
Толькі паміж красавіком 2009 і чэрвенем 2010 г. былі адстрэляныя 738 амерыканскіх савак у 37 розных месцах, якія раней былі прызнаныя галоўнымі для гнездавання і зімоўкі гэтага віду на Брытанскіх астравах. 
Цікава, што са студзеня 2009 г. у Гішпаніі былі адзначаны толькі 2 амерыканскія саўкі. Да таго ж невядома, ці гэта залёты з Амерыкі, ці з Еўропы.
Трэці сэмінар па захаванню еўрапейскай саўкі адбудзецца ў лістападзе ў Сэвільлі, дзе будзе прыняты заклік да іншых еўрапейскіх краін з папуляцыямі амерыканскай саўкі, якія самі падтрымліваюцца ў прыродных умовах да іх знішчэння на прыкладзе поспеху, дасягнутага ў Вялікабрытаніі. Такіх краін у Еўропе яшчэ тры – гэта Францыя, Нідэрланды і Бельгія.
 

Паводле www.nonnativespecies.org і www.birdwatch.co.uk (тэкст і здымак амерыканскай саўкі) падрыхтаваў Дзьмітры Вінчэўскі для www.birdwatch.by
 

НА ГЭТУЮ ТЭМУ:
Пустальга працягвае знікаць у Вялікабрытаніі

Крах папуляцыі заходняга салаўя ў Вялікабрытаніі

Кукаванне зязюлі ўсё радзей можна пачуць у Вялікабрытаніі